Yandex Maps ilovasida O‘zbekistonning diqqatga sazovor joylari endi 3D formatda namoyish etilmoqda. Foydalanuvchilar Toshkent, Buxoro, Samarqand va Xiva shaharlaridagi mashhur obidalarni uch o‘lchamli rangli modellar orqali ko‘rishlari mumkin. Bu imkoniyat binolar va madaniy yodgorliklarning hajmli maketlari yordamida xaritada yaxshiroq mo‘ljal olish va turli rakurslardan diqqatga sazovor joylar bilan yaqindan tanishishga yordam beradi.

Toshkentning 3D xaritasida Hazrati Imom ansambli, Ko‘kaldosh madrasasi va Chorsu bozori, Buxoroda Poy Kalon va Labi hovuz me’moriy ansambllari, Samarqandda Registon maydoni va Mirzo Ulug‘bek rasadxonasi, Xivada esa Kaltaminor minorasi chizilgan. O‘zbekistondagi 27 ta obyektning 3D modelini yaratish uchun 350 soatdan ortiq vaqt sarflangan.

Modellarda arxitektura xususiyatlari, yozuvlar, ranglar, soyalar va tekstura aniqligi aks ettirilgan. Tungi mavzu kiritilganda, ilovada, xuddi haqiqiy shaharda qorong‘u tushgandagidek, yorug‘lik paydo bo‘ladi. Bu imkoniyat sayohatni rejalashtirishda diqqatga sazovor joylar bo‘ylab oldindan virtual sayr qilish, fotosuratlar uchun rakurslar topish va sayr qilish uchun yo‘nalishlarni tuzishga yordam beradi.

Yandex Maps ilovasida 3D modelni ko‘rish uchun qidiruvga joy nomini kiritish yoki xaritada obyektni topib, uni yaqinlashtirish kifoya. Uch o‘lchamli modelni chetdan ko‘rish uchun ekranda ikki barmoq bilan yuqoriga parallel harakat qilish mumkin.