Mamlakatimizda joriy yil besh oyida sanoat 6,4 foiz o‘sgan, eksport miqdori 18 foiz, xorijiy investitsiyalar 46 foiz oshgan. Qiymati 3 milliard dollarlik 2 ming 500 dan ziyod yangi quvvat ishga tushgan. 2 million 400 ming odam daromadli bo‘lgan.

Shu bilan birga, dunyoda turli mojarolar avj olyapti, savdo aloqalari va logistika qiyinlashyapti. Tinchlik, adolat va inson qadrini ulug‘lashga bo‘lgan ehtiyoj har qachongidan ham oshib boryapti.

O‘zbekistonda davlat boshqaruvi va jamiyat hayotida ochiqlik va hisobdorlikni ta’minlash so‘nggi yillarda asosiy ustuvor yo‘nalishga aylandi. Bu yo‘lda amalga oshirilayotgan islohotlar qanday natija bermoqda? Qayerda ishlar yurishyapti, qayerda esa hali-hanuz qog‘ozda qolmoqda?

Prezidentimiz raisligida 16 iyun kuni o‘tkazilgan navbatdagi videoselektor yig‘ilishi aynan shu savollarga javob izlash, har bir hudud kesimida vaziyatni atroflicha tahlil qilishga qaratildi.

Xo‘sh, besh oyda nimalarga erishildi?

Yig‘ilish avvalida 2025 yilning birinchi yarmiga yaqin - yanvar-may oylari uchun iqtisodiy va ijtimoiy ko‘rsatkichlar muhokama qilindi. Statistik ma’lumotlar mamlakatda makroiqtisodiy barqarorlikka erishilayotganini ko‘rsatmoqda:

— YAIM o‘sishi 5,6 foizga yetdi - bu mintaqada eng yuqori ko‘rsatkichlardan biri;
— Inflyatsiya 6,9 foizga tushirildi - narx-navo borasida sezilarli barqarorlik yaratildi;
— Eksport hajmi 10 milliard dollardan oshib, tashqi savdoda faol o‘sish kuzatilmoqda;
— Yangi ish o‘rinlari soni 200 mingdan ortiqni tashkil qildi;
— Kam ta’minlangan oilalarni qo‘llab-quvvatlash maqsadida 1,2 million nafar fuqaroga davlat yordami ko‘rsatildi.

Bu raqamlar qog‘ozda emas, hayotda o‘z aksini topishi kerakligi alohida ta’kidlandi. Chunki xalqning real hayoti - asosiy mezondir.

Prezidentimiz to‘g‘ridan-to‘g‘ri va aniq misollar bilan hududlar kesimidagi kamchiliklarni ko‘rsatib o‘tdi. Ayrim hokimiyatlar haligacha byurokratik yondashuvdan xalos bo‘la olmagan. Tadbirkorlarga yer ajratish, investitsiyani jalb qilish, aholiga xizmat ko‘rsatish sohasida sustkashlik saqlanib qolmoqda.

Davlatimiz rahbari aholining dardu tashvishlarini eshitib, odamlarga sharoit yaratib berish rahbarlarning asosiy vazifasi ekanini ta’kidladi.

Shu bois Xalq qabulxonalari tarkibi fidoyi mutaxassislar bilan to‘ldirilishi aytildi. Endi Xalq qabulxonalariga viloyat va tuman hokimining o‘zi rahbarlik qiladi. Ular har kuni ishini aholi dardi va tashvishini eshitishdan boshlaydi. Bugun tug‘ilgan muammoni keyinga o‘tkazishga yo‘l qo‘yilmaydi. Murojaatni boshqa idoraga yubormasdan, shu joyning o‘zida hal qiladi. Buning uchun tuman hokimining vakolatlari kengaytiriladi.

Eng ko‘p shikoyatlar - ichimlik suvi, elektr va gaz ta’minotidagi uzilishlar, qishloqlarda yo‘llar va transport masalasining yechilmasligi, maktab, bog‘cha va shifoxonalarda sifatli xizmat ko‘rsatishdagi muammolar, yoshlarni ish bilan ta’minlashdagi kamchiliklar bilan bog‘liq.

Bunday murojaatlarning ko‘payishi aholining o‘z huquqlari va manfaatlarini talab qilish madaniyati o‘sib borayotganidan dalolatdir. Ammo bu davlat idoralari faoliyatiga yuqori talab ham bo‘lmoqda.

Shuningdek, vazirliklardagi mas’ullar tartib-intizomga qat’iy e’tibor bermagani uchun islohotlar ijrosi cho‘zilib ketyapti. Sud qarorlari vaqtida bajarilmayotgani yuzasidan ham murojaatlar ko‘p.

Shu bois yig‘ilishda ijro intizomini mustahkamlash, aholi muammolari bilan ishlash bo‘yicha yangi tizim yo‘lga qo‘yilishi belgilandi.

“Tuman bo‘g‘ini samarali ishlamasa, yuqoridan qanday topshiriq tushirilmasin, ko‘zlangan maqsadlarga erishib bo‘lmaydi”, - dedi Prezident.

Bu borada muhim tashabbuslar ilgari surildi. Endi tumanlarda yondashuv ham, boshqaruv tizimi ham o‘zgaradi. Bu yil Surxondaryo viloyatida hamda 16 ta hududda yangicha boshqaruv joriy etiladi. Jumladan, iqtisodiyot va moliya, investitsiya, qishloq xo‘jaligi, bandlik, qurilish, ekologiya, madaniyat, oila va xotin-qizlar, yoshlar masalalari bo‘yicha 9 ta davlat idorasining tuman bo‘limi hokimlik tizimiga o‘tadi.

Prezidentimiz tomonidan barcha darajadagi rahbarlarga qo‘yilgan aniq va qat’iy topshiriqlar o‘z vaqtida ijro etilishi ayni muddaodir. Zero, islohotlar faqat qog‘ozda emas, hayotda ham bo‘lishi kerak. Davlat rahbarining doimiy ravishda xalq bilan muloqot qilishi, joylardagi haqiqiy holatni o‘rganishi va tanqidiy ruhda muammolarni tahlil qilishi davlat boshqaruvidagi yangi siyosiy madaniyat shakllanayotganini ko‘rsatadi.