Bu yil Prezidentimiz qaroriga ko‘ra, mustaqilligimizning shonli 34 yillik to‘yi munosabati bilan tashkil etiladigan har bir tadbir “Vatan uchun, millat uchun, xalq uchun!” degan hayotbaxsh g‘oya ostida nishonlanishi belgilandi. Qarorga muvofiq yurtimizda amalga oshirilayotgan izchil islohotlar mazmun-mohiyatini keng jamoatchilikka yetkazish, bayram tadbirlarini ko‘tarinki ruhda o‘tkazish borasida barcha chora-tadbirlar tasdiqlandi.

Agar sarhisob qiladigan bo‘lsak, o‘tgan qisqa vaqt ichida mamlakatimizda katta natijalar qayd etildi. O‘zbekistonning dunyoga ochilgani, yaqin qo‘shnilari bilan tarixiy rishtalarni tiklagani, xalqaro miqyosda katta tashabbuslarni dadil ilgari surayotgani, ko‘p millatli xalq Prezident atrofida birlashib, sobitqadam ildamlayotgani shular jumlasidandir.

Haqiqatan ham shu aziz yurt fuqarolari sifatida har birimizning shaxsiy hayotimizda, oilamizda, mahallamizda, mehnat jamoamizda yoki ilmiy-ijodiy faoliyatimizda yuz bergan o‘zgarishlardan quvonmaslik, g‘ururlanmaslikning iloji yo‘q.

Ayniqsa, so‘nggi sakkiz yilda amalga oshirilayotgan olamshumul o‘zgarishlarga boqib, hayratga tushyapmiz. Shahar va qishloqlarimiz qiyofasi tubdan o‘zgarib, xalqimiz turmush darajasining ortib borayotgani Prezidentimizning tinmas hatti-harakati, jo‘shqin ish faoliyati, uzoqni ko‘ra bilishi va xalqchil, ijtimoiy yo‘naltirilgan siyosati mahsulidir.

O‘tgan qisqa davrda iqtisodiyotni liberallashtirish, raqamli iqtisodiyotni joriy etish, xususiy mulk huquqini himoya qilish va uning ustuvor mavqeini kuchaytirish, valyuta bozorini erkinlashtirish, hududlarni ijtimoiy-iqtisodiy jihatdan kompleks rivojlantirish bo‘yicha keng ko‘lamli ishlar amalga oshirildiki, bularni sanab adoiga yetolmaysiz.

Davlatimiz rahbarining mustahkam siyosiy irodasi tufayli tadbirkorlar o‘z biznesini rivojlantirish uchun erkinlik va yangi-yangi imkoniyatlarga ega bo‘lmoqda. Dehqon va fermerlar, klaster xo‘jaliklari o‘zlari yetishtirgan hosilning haqiqiy egasiga aylanmoqda.

Sohani rivojlantirishga davlat siyosati darajasida e’tibor qaratilib, keyingi besh-olti yilda mamlakatimizda tadbirkorlik subyektlarining huquqlari va qonuniy manfaatlarini ishonchli himoya qilish, iqtisodiyotda davlat ulushini bosqichma-bosqich kamaytirishga qaratilgan aniq manzilli chora-tadbirlar amalga oshirildi.

Yetti, sakkiz yil oldin boshlangan bu boradagi amaliy ishlar samarasi bugun mamlakatda tadbirkorlikning taraqqiy etib borayotgani, yangi-yangi tadbirkorlik subyektlari tashkil etilgani, aholining salmoqli qismi shu sohada mehnat qilayotganida namoyon bo‘layotir.

Davlatimiz rahbarining odilona siyosati, xalqimizning bunyodkorligi evaziga tarix uchun qisqa bir davrda barcha sohalarda, eng muhimi, odamlar hayotida mana shu islohotlarning amaliy natijalari namoyon bo‘la boshladi. Barcha o‘zgarish va yangilanishlarning markaziga inson va uning manfaatlari qo‘yildi.

Qisqa davr mobaynida mamlakatimiz erishgan ulkan yutuqlar bizning haqiqatan ham Uchinchi renessans poydevorini barpo etishga qodir ekanimizni, mana shunday sur’at va qat’iyat bilan harakat qiladigan bo‘lsak, ulug‘ maqsadlarimizga, albatta, yetib borishimizni yaqqol namoyon etmoqda.

Mustaqillik yillarida aholi o‘rtasida va davlat idoralarida tadbirkorlarga munosabat o‘zgardi. Jamiyatda ularning obro‘si va mavqei kun sayin ortib boryapti. Chunki mulk va mulkdorlar, xususiy sektor vakillarining huquq va manfaatlari qonun yo‘li bilan himoya qilinishi yanada mukammallashdi.

Ana shulardan kelib chiqib, “xususiy mulk daxlsizligi”, “iqtisodiy faoliyat erkinligi” singari fundamental demokratik tushunchalar va hayotiy ko‘nikmalar yangi O‘zbekistonda real voqelikka aylanib boryapti, deb dadil ayta olamiz.

Bu yil eng ulug‘, eng aziz bayramimiz “Yangi O‘zbekistonda el aziz, inson aziz” shiorini asosiy g‘oya sifatida o‘zida mujassam etyapti. Chunki istiqlol xalqchil va demokratik tamoyillarga asoslangan davlat, inson qadri ustuvor bo‘lgan erkin fuqarolik jamiyatini barpo etish imkonini berdi.

Xulosa qilib aytganda, davlatimiz rahbari imzolagan “O‘zbekiston Respublikasi davlat mustaqilligining o‘ttiz to‘rt yillik bayramiga tayyorgarlik ko‘rish va uni o‘tkazish to‘g‘risida”gi qaror har birimizni 34 yil oldingi tarixga bir bor teran nigoh tashlash, mustaqillik mas’uliyatini chuqurroq anglash, yurt taraqqiyotiga yanada ko‘proq hissa qo‘shishga chorlaydi.