Davlatimiz rahbari Jizzax viloyatiga tashrifi davomida viloyatning agrar, sanoat va turizm salohiyatini yuksaltirish bo‘yicha qilinayotgan ishlar bilan yaqindan tanishdi.

Xususan, Jizzax viloyati kartoshkachilikni rivojlantirishga zamin qilib olinmoqda. Bugungi kunda Zomin ilmiy tajriba stansiyasida xorijiy va mahalliy seleksiyaga mansub 12 ta nav birlamchi urug‘chiligi yo‘lga qo‘yildi. So‘nggi yillarda O‘zbekistonning hududlarini ixtisoslashtirish, qishloq xo‘jaligi va turizm salohiyatini amaliy rivojlantirish bo‘yicha qat’iy qadamlar qo‘yilmoqda. Jizzax viloyati ana shu strategiyaning markaziy nuqtalaridan biriga aylanmoqda. Viloyat kartoshkachilik, dukkakli ekinlar, suv xo‘jaligi va turizm yo‘nalishlarida yangi bosqichga kirmoqda. Bu nafaqat mahalliy aholi farovonligi, balki milliy iqtisodiyotning diversifikatsiyasi uchun ham katta ahamiyatga ega.

Zomin tumanidagi ilmiy-tajriba stansiyasi asosida hozirgi kunda 12 ta mahalliy va xorijiy seleksiyaga mansub kartoshka navlari bilan birlamchi urug‘chilik ishlari boshlab yuborildi. Oddiy holatda kartoshka urug‘chiligi 6–7 yil va 8 ta texnologik bosqichni talab qiladi. Lekin yangi innovatsion yondashuv asosida bu jarayon 4 bosqichga qisqartirilib, bor-yo‘g‘i 2 yilda natija olish imkoni yaratilmoqda.

Ushbu tezkor sikl tufayli, 12 tonna yuqori avlod super elita darajasidagi urug‘lik kartoshka mahalliy aholiga bepul tarqatiladi. Natijada 120 tonna elita urug‘lik yetishtirish imkoni yaratiladi. Bu esa viloyatda kartoshka yetishtirishni industrial asosga o‘tkazish, ichki talabni to‘liq qondirish, qolaversa, eksportbop mahsulot hajmini oshirishga xizmat qiladi.

Qishloq xo‘jaligini rivojlantirishda faqat urug‘lik emas, balki suv resurslaridan samarali foydalanish ham muhim ahamiyatga ega. Shu maqsadda Zarbdor tumanida kanallarda nasos stansiyalari va magistral quvurlar qurish loyihalari rejalashtirilgan. Bu ishlar suv tejovchi texnologiyalarni tatbiq etish, yangi ekin yerlari o‘zlashtirish va suvdan unumli foydalanish imkonini yaratadi.

Bundan tashqari, dukkakli ekinlar — soya, mosh, no‘xat va boshqalarni ekish masalasi ham strategik yo‘nalish sifatida belgilangan. Ushbu ekinlar kam suv talab qilgani bois, ular hosildorlik va eksportboplik nuqtayi nazaridan ham ustunlik beradi.

Sir emas, Jizzax viloyati nafaqat agrar, balki turizm salohiyati bilan ham alohida ajralib turadi. Viloyatdagi tabiiy landshaft — tog‘, vodi, cho‘l va ko‘llar uyg‘unligi yilning barcha fasllarida turizmni rivojlantirish uchun ajoyib sharoit yaratadi.

“Zomin” turistlik-rekreatsion zonasi, yaqinda faoliyat boshlagan Zomin aeroporti va yangi yo‘llar hududga sayyohlar oqimini kengaytirishga xizmat qiladigan asosiy infratuzilma elementlaridir. Viloyatda 6 ta yirik kanal bo‘ylab tashkil etilgan sayilgohlar mahalliy va xorijiy turistlar uchun dam olish, ekologik turizm, velotur va oilaviy sayohatlar imkonini yaratadi.

Ayni paytda “Aydar-Arnasoy” ko‘llar tizimi qirg‘oqlarida zamonaviy turizm markazi tashkil etilishi ko‘zda tutilmoqda. Bu yo‘nalishda ekoturizm, baliqchilik, suv sportlari va madaniy-ommaviy tadbirlar kabi faoliyat turlari rivojlantiriladi.

Jizzax viloyatida amalga oshirilayotgan islohotlar viloyatni kompleks rivojlantirish, uni agrar, sanoat va turistlik markazga aylantirish sari olib bormoqda. Innovatsion urug‘chilik tizimi orqali kartoshkachilikni rivojlantirish, suv infratuzilmasini modernizatsiya qilish va turizm infratuzilmasini yaratish kabi qadamlar Jizzaxni yaqin yillarda mamlakatdagi eng faol iqtisodiy hududlardan biriga aylantirishi mumkin.

Bu jarayon nafaqat iqtisodiy o‘sishni ta’minlaydi, balki aholi bandligini oshiradi, hududiy tenglikni mustahkamlaydi va xalq farovonligiga bevosita ta’sir ko‘rsatadi.