Keyingi yillarda O‘zbekiston tobora inson qadri, uning huquq va manfaatlari ulug‘lanadigan ijtimoiy davlatga aylanib bormoqda. Aholi bandligini ta’minlash, zamonaviy ish o‘rinlarini ko‘paytirish, kambag‘allikni qisqartirish, yordamga muhtoj toifalarni qo‘llab-quvvatlash bo‘yicha davlat dasturlari ijobiy natijalar berayotir.

Davlatimiz rahbarining “O‘zbekiston Respublikasi davlat mustaqilligining o‘ttiz to‘rt yillik bayramiga tayyorgarlik ko‘rish va uni o‘tkazish to‘g‘risida”gi qarorida so‘nggi yillarda erishgan yutuqlarimizga bundan 8 yil oldin boshlagan islohotlarimiz mustahkam zamin yaratgani qayd etildi.

Chindan ham o‘tgan 8 yil mamlakatimiz iqtisodiy-ijtimoiy, madaniy-ma’rifiy sohalarida katta yutuqlarga erishdik. Qisqa muddatda mamlakatimiz iqtisodiyoti shiddat bilan o‘sib, yalpi ichki mahsulotimiz hajmi tarixda birinchi marta 110 milliard AQSH dollaridan oshdi. “Yashil” va innovatsion iqtisodiyotga o‘tish, muqobil energiya manbalarini yaratish bo‘yicha ulkan dastur va loyihalar amalga oshirmoqdamiz.

Ta’lim sohasidagi islohotlar ilgari tariximizda misli ko‘rilmagan o‘zgarishlarga olib kelmoqda. Jumladan, maktabgacha ta’lim tizimida qamrov 2017 yildagi 27 foizdan hozirgi paytda 77 foizga, oliy ta’limda esa 9 foizdan 42 foizga yetgani, yurtimizda ijod maktablari, ixtisoslashgan maktablar va Prezident maktablari kabi yangi modeldagi maktablar tizimi paydo bo‘ldi.

Eng asosiysi, oxirgi yillarda erishayotgan yutuqlarimiz nafaqat milliy va mintaqaviy doiralarda, balki jahon hamjamiyatida tan olinmoqda. Erishgan barcha yutuqlarimiz jonajon Vatanimizning nufuzi va obro‘yini yanada yuksaltirmoqda. Bu esa bizning har bir kunimizdan rozi bo‘lib yashashga undamoqda.

Bu yilgi eng ulug‘, eng aziz bayram “Vatan uchun, millat uchun, xalq uchun!” degan ezgu g‘oya ostida keng nishonlanadi. Qarorda mazkur shior ostidagi bayram tadbirlari respublika bo‘ylab keng o‘tkazilishi belgilab berildi. Aytish kerakki, bu tadbirlar o‘zida istiqlol shukuhi, xalqimizni bir maqsad yo‘lida birlashtirish, Yangi O‘zbekiston poydevorini yanada mustahkamlash, munosib hayot kechirish kabi ezgu maqsadlarni o‘zida mujassam etadi desak mubolag‘a bo‘lmaydi. Bu g‘oya o‘zida Yangi O‘zbekistonning islohotlarga boy, xalq manfaatini ustuvor qo‘ygan, inson qadrini eng oliy qadriyat sifatida qabul qilgan yangi davrini aks ettiradi.

Bir so‘z bilan aytganda, mamlakatimizdagi orqaga qaytmaydigan va muqarrar tus olgan bugungi xalqchil demokratik jarayonlar mustaqillik bergan eng katta ne’mat, desak mubolag‘a bo‘lmaydi. Zotan, mustaqillik yillari Vatanimiz uchun tom ma’nodagi uyg‘onish, tiklanish va yuksalish davri bo‘ldi. Shu nuqtai nazardan, mustaqilligimizni asrab-avaylash, jondek aziz Vatanimiz taraqqiyotiga hissa qo‘shish har birimizning muqaddas burchimizdir.