Davlatimiz rahbari Shavkat Mirziyoyevning hududlarga tashrifi xalqimiz farovonligi va turmush darajasini oshirish, shahar va tumanlarning mavjud resurs va imkoniyatlaridan samarali foydalanish orqali iqtisodiyot hamda infratuzilmani rivojlantirish, eng asosiysi, inson qadrini ulug‘lashda muhim ahamiyat kasb etadi.

Xususan, Prezidentimizning Jizzax viloyatiga tashrifi haqida ham hech bir mubolag‘asiz shunday deyish mumkin. Tashrif doirasida davlat rahbarining Zomin tumanidagi maishiy texnika zavodi qurilishi bilan tanishuvi mamlakatda sanoat sohasida olib borilayotgan izchil islohotlar va zamonaviy ishlab chiqarish infratuzilmasini yaratish borasidagi intilishlarning yaqqol ifodasi bo‘ldi.

Ushbu zavod nafaqat yirik ishlab chiqarish maydoni, balki mamlakatning elektrotexnika sohasidagi istiqbolini belgilab beradigan strategik loyihadir. U “Navoiy” maxsus sanoat parkining filiali sifatida 80 gektar maydonda tashkil etilgan bo‘lib, umumiy qiymati 150 million dollarni tashkil etadi.

Zavodda yiliga 1 million dona maishiy texnika vositalari, jumladan, kir yuvish mashinasi, sovutkich, televizor, elektr suv isitkichlar va ularning butlovchi qismlari ishlab chiqariladi. Umumiy 100 turdagi mahsulot ishlab chiqarish rejalashtirilgan bo‘lib, mahalliylashtirish darajasi 70 foizga yetadi. Bu import hajmini sezilarli qisqartirish, ichki bozorni raqobatbardosh milliy mahsulotlar bilan to‘ldirish va texnologik suverenitetni mustahkamlashda muhim ahamiyat kasb etadi.

Loyiha amalga oshirilgandan so‘ng zavodning yillik ishlab chiqarish hajmi 320 million dollarni tashkil etadi. Shundan 140 million dollarlik mahsulot eksportga yo‘naltiriladi. Bu raqamlar O‘zbekistonning nafaqat ichki talabni qondirish, balki mintaqaviy bozorlarida o‘z o‘rniga ega chiqishi uchun muhim imkoniyat yaratadi.

Prezident tomonidan mamlakatni mintaqadagi “elektrotexnika xabi”ga aylantirish vazifasi qo‘yilgan. Bu reja zamirida yuqori texnologiyali, sifatli va eksportbop mahsulotlarni milliy brendlar ostida ishlab chiqarish orqali O‘zbekistonni global qiymat zanjirlariga integratsiya qilish maqsadi mujassamdir.

Zomindagi zavod bu strategiyaning amaliy ifodasi. U faqatgina ishlab chiqarish nuqtayi nazaridan emas, balki logistika, ta’lim, xizmat ko‘rsatish, dizayn va savdo kabi qo‘shimcha sohalarda ham yuzlab yangi imkoniyatlar eshigini ochadi.

Zavodda to‘g‘ridan-to‘g‘ri 7 ming nafarga yaqin fuqaro ish bilan ta’minlanishi rejalashtirilgan. Bu, ayniqsa, hududlar uchun katta ijtimoiy ahamiyatga ega. Bandlik orqali aholi daromadlari oshadi, ijtimoiy barqarorlik mustahkamlanadi va aholi turmush darajasi yuqorilaydi. Shu bilan birga, mazkur sohada faoliyat yuritadigan mutaxassislarni tayyorlash uchun o‘rta va oliy ta’lim muassasalari bilan hamkorlik yanada kengaytiriladi.

Bu yerda ishlab chiqariladigan mahsulotlar Ozarbayjon, Qozog‘iston, Qirg‘iziston, Tojikiston va boshqa 15 dan ortiq mamlakatga eksport qilinishi rejalashtirilgan. Bu O‘zbekistonning tashqi savdodagi ulushini oshirish, yangi eksport bozorlarini egallash va tashqi savdo balansini yaxshilashga xizmat qiladi.

Zomin tumanidagi maishiy texnika zavodi bu O‘zbekistonning yangi sanoat siyosati, innovatsiyaga asoslangan ishlab chiqarish va eksport salohiyatini kengaytirish sari tashlangan dadil qadamdir. U nafaqat hududiy iqtisodiyotni, balki butun mamlakatning iqtisodiy salohiyatini yuksaltirishga xizmat qiladi.

Bu kabi loyihalar orqali O‘zbekiston “xomashyodan tayyor mahsulotga”, “eksportdan qimmatli brendlarga” o‘tayotgan yangi sanoat bosqichini boshdan kechirmoqda. Zominda qurilayotgan zavod ana shu jarayonning yorqin ramziga aylanmoqda.