Dunyodagi har bir davlatning milliy suvereniteti va mustaqilligi uning jahon hamjamiyatidagi o‘rnini belgilaydigan asosiy mezondir. Bu hududiy yaxlitlik, siyosiy barqarorlik va o‘z taqdirini mustaqil hal qilish huquqi bilan chambarchas bog‘liq. Milliy mustaqillik – faqat davlat ramzi emas, balki uning siyosiy-huquqiy subyekt sifatida xalqaro maydondagi tan olinishi, iqtisodiy manfaatlari va xalqining tinch hayotiga kafolat beradigan tayanchdir.

Jonajon mamlakatimizning milliy istiqlolga erishishi – 1991 yil 31 avgustda xalq irodasi, fidoyiligi va azmu shijoati bilan amalga oshdi. Bu sana tarixga millatning azalий orzusi ro‘yobga chiqqan kun sifatida muhrlandi. Bugun, 34 yil o‘tib, mustaqillik nafaqat milliy o‘zlikni anglash, balki Yangi O‘zbekistonni barpo etishda hal qiluvchi omilga aylandi. Ayniqsa, yurtimizda barpo etilayotgan demokratik, adolatli, fuqarolar huquqi ustuvor bo‘lgan davlatni shakllantirish jarayonida istiqlolning hayotiy ahamiyati yanada yuksak baholanmoqda.

Prezidentimiz tomonidan qabul qilingan “O‘zbekiston – 2030” strategiyasi ana shu istiqlol g‘oyalarining mantiqiy va amaliy davomidir. Unda davlat va jamiyat rivojining ustuvor yo‘nalishlari aniq belgilab berildi. Xususan, aholining real daromadini 2030 yilgacha 2 barobar oshirish, YAIMni 160 milliard dollarga, eksportni 45 milliard dollarga yetkazish, har bir fuqaroga munosib turmush sharoitlarini yaratish kabi maqsadlar belgilangan. Iqtisodiyotning barqaror o‘sishini ta’minlash, sog‘liqni saqlash va ta’lim tizimlarini isloh qilish, ekologik muvozanatni saqlash, davlat boshqaruvida shaffoflik va samaradorlikni kuchaytirish masalalari strategiyaning bosh g‘oyalaridandir.

Ayni paytda mamlakatimizda qulay investitsiya muhiti yaxshilanmoqda, tashqi iqtisodiy aloqalar kengaymoqda, xalqaro tashkilotlar bilan hamkorlik mustahkamlanmoqda. Energetika, sanoat, qishloq xo‘jaligi va xizmat ko‘rsatish sohalarida amalga oshirilayotgan islohotlar davlatning iqtisodiy mustaqilligini mustahkamlab bormoqda. Bu esa fuqarolarning daromadini oshirish, yangi ish o‘rinlari yaratish va ijtimoiy barqarorlikni ta’minlashga xizmat qilmoqda.

Shu bilan birga, mustaqillik tufayli, ayniqsa, keyingi sakkiz yilda amalga oshirilgan oqilona siyosat evaziga yuqorida tilga olingan yutuqlarga erishilmoqda, desak mubolag‘a bo‘lmaydi. Qo‘shnilar bilan yaxshi qo‘shnichilik, mintaqaviy xavfsizlik va barqarorlikni ta’minlash, xalqaro hamjamiyat bilan teng va manfaatli hamkorlikni rivojlantirishga qaratilgan ochiq tashqi siyosat yuritilmoqda.

Bugungi kunda tinchlik va barqarorlikni asrash, millatlararo totuvlik va bag‘rikenglik muhitini saqlash, inson qadrini ulug‘lash kabi tamoyillar mamlakat rivojida hal qiluvchi ahamiyatga ega. Bu esa mustaqillik tufayli mavjud bo‘lgan huquqiy kafolatlar, kuchli davlat va faol jamiyat uyg‘unligi natijasidir.

Shu bois, har bir fuqaro mustaqillikni qadrlashi, uning mazmun-mohiyatini teran anglashi, Vatanimiz taqdiri uchun mas’uliyatni his qilishi zarur. Zero, davlatimiz rahbarining “O‘zbekiston Respublikasi davlat mustaqilligining o‘ttiz to‘rt yillik bayramiga tayyorgarlik ko‘rish va uni o‘tkazish to‘g‘risida”gi qarorida qayd etilganidek, “Aynan mustaqillik, barcha siyosiy-huquqiy kafolatlarni o‘zida mujassam etgan holda, “O‘zbekiston – 2030” strategiyamizni amalga oshirish, jamiyatimizda tinchlik, do‘stlik va hamjihatlik muhitini kuchaytirish, inson qadrі, huquq va manfaatlarini ta’minlash, mintaqamizda yaxshi qo‘shnichilik aloqalarini yanada rivojlantirish, dunyo mamlakatlari bilan faol hamkorlik qilish, Vatanimizning xalqaro miqyosdagi obro‘-e’tiborini yuksaltirishda beqiyos tayanch bo‘lib xizmat qilmoqda.”

Xulosa qilib aytganda, mustaqillik — bu ulug‘ ne’mat. Uni asrash, mustahkamlash va kelajak avlodlarga munosib tarzda yetkazish bugungi barchamizning muqaddas burchimizdir.