Bu yil mamlakatimiz mustaqillikka erishganiga 34 yil to‘ldi. Bu ulug‘ bayramning xalqimiz hayotida tutgan o‘rni beqiyos. Albatta, bu kun xalqimizning ijtimoiy-siyosiy, ma’naviy hayotida beqiyos o‘rin egallagan, har yili eng ulug‘, eng aziz bayram sifatida katta shodu-xurramlik bilan nishonlanadigan qutlug‘ ayyomdir.

Yurtimiz rivoji yo‘lida amalga oshirilayotgan muhim yangilanish va islohotlar, ilm-fan yuksalishi, sport sohasidagi yutuqlar, turli jabhalarda izlanishlar olib borayotgan olimlarimizga yuksak e’tibor, respublikamiz iqtisodiyoti va ijtimoiy hayotining har bir sohasiga innovatsiyalarning joriy etilishi bo‘yicha qilinayotgan sa’y-harakatlar bugun o‘z samarasini bermoqda. Mamlakatimizda amalga oshirilayotgan bunyodkorlik ishlari, zamonaviy texnologiyalardan foydalangan holda ishlab chiqarishning tashkil etilishi buning yaqqol misolidir.

Mustaqillikning qadr-qimmati va ahamiyati yildan-yilga ortib bormoqda. Mamlakatimiz taraqqiyotning yangi bosqichiga qadam qo‘yib, barcha soha va tarmoqlarda yangilanish jarayonlari kechmoqda. O‘tgan davr erkin va farovon hayotni, buyuk kelajakni faqat va faqat mustaqillik asosidagina qurish mumkinligini ko‘rsatdi. Bu vaqt ichida sud-huquq sohasida ham ulkan o‘zgarishlar yuz berdiki, soha tubdan yangilandi, desak, xato qilmagan bo‘lamiz. 2023 yilda umumxalq referendumi asosida Konstitutsiyaning yangilangani esa, barcha yo‘nalishlarda, jabhalarda o‘z samarasini ko‘rsata boshladi.

Mustaqillikning 34 yilligi “Vatan uchun, millat uchun, xalq uchun!” shiori ostida o‘tkazilishida ham teran ma’nolar borki, butun dunyoda siyosiy beqarorlik yuz berib turgan ayni kunlarda, bizning birlik, birdamlikka yanada ko‘proq ehtiyojimiz bor. Binobarin, davlatimiz rahbarining “O‘zbekiston Respublikasi davlat mustaqilligining o‘ttiz to‘rt yillik bayramiga tayyorgarlik ko‘rish va uni o‘tkazish to‘g‘risida”gi qarorida ham ko‘p millatli va ko‘p konfessiyali jamiyatimizdagi tinchlik, o‘zaro do‘stlik va hamjihatlik muhiti – bizning bebaho boyligimiz ekani, uni asrab-avaylash va mustahkamlash barchamizning muqaddas burchimiz bo‘lib qolishi zarurligi alohida qayd etilgani e’tiborga molikdir.

Hech bir mamlakat o‘zi yolg‘iz holda taraqqiy etgan emas. Chunki murakkab dunyoning ko‘pdan-ko‘p muammolari aynan hamkorlikda, do‘stona tarzda hal etiladi. Shu jihatdan qaraganda, O‘zbekistonda xavfsizlik, millatlararo totuvlik va diniy bag‘rikenglikni ta’minlash, chuqur o‘ylangan, o‘zaro manfaatli va amaliy ruhdagi tashqi siyosat yuritish orqali davlatimiz mustaqilligi va suverenitetini mustahkamlash, qo‘shnilarimiz bilan raqobat qilish emas, balki hamkorlik qilish, mintaqamizdagi muammolarni birgalikda hal etish tamoyiliga qat’iy amal qilinmoqda. Davlatning xalqga bunday qayishishi natijasida odamlarning ruhiyatida katta o‘zgarish yuz berdi. Fuqarolarning ijtimoiy faolligi ortdi, siyosiy xabardorlik darajasi ko‘tarildi.

Yana bir gap. Istiqlol yillarida yangi avlod kamolga yetdi. Eng muhimi, hayotining ma’no-mazmuni, maqsad-muddaosi va dunyoqarashi tubdan o‘zgargan yurtdoshlarimizni mustaqillikni yanada mustahkamlash, tinchlik va osoyishtaligimizni ko‘z qorachig‘idek asrab-avaylash, barkamol avlodni tarbiyalab, mamlakatimizning jahon­dagi nufuzini yanada yuksaltirishdek ezgu maqsadlar birlashtirdi.

Istiqlol – millatimiz, mamlakatimizning jahondagi obro‘-e’tibori, shon-shavkatini ko‘t­aradigan sog‘lom avlodni, har jihatdan barkamol va fidoyi o‘g‘il-qizlarni tarbiyalash, ularni voyaga yetkazish va baxtini ko‘rishdir.

Umuman olganda, o‘ttiz to‘rt yil – tarix uchun bir lahza, xolos. Lekin shu davrda jonajon Vatanimiz barcha sohalarda ulkan yutuqlarga erishdi. Eng muhimi, odamlarning ruhiyatida katta o‘zgarish yuz berdi. Bu ijobiy o‘zgarishlar avvalo, aholining turmush tarzida kundalik hayotida bo‘y ko‘rsatmoqda.