Mustaqillik – insonning erkin va ozod ravishda, oʻz ixtiyori bilan boshqalarga boʻysunmasdan ish yurita olishi, millat, davlat va jamiyat hayoti, ularning taraqqiyotini, ustuvor maqsad va vazifalarini mustaqil tarzda amalga oshirilishini anglatadigan tushuncha.

Bundan 34 yil avval berilgan imkoniyat amaliyoti – bizga berilgan huquqdir. Bu – yurtimizning tabiiy boyliklariga egalik qilish huquqi, xalqimiz qudrati, salohiyati, aqli zakovatiga tayanish huquqi, Oʻzbekistonda yashayotgan har bir inson, har bir oila uchun munosib hayot kechirish huquqi, kelajak avlodlar uchun har tomonlama yuksalayotgan, rivojlanayotgan Vatan qoldirish huquqi, jahon hamjamiyatida oʻz ovoziga ega boʻlish teng huquqi.

Mustaqillik tufayli aynan ana shu huquqlar amaliyoti asnosida Oʻzbekistonni dunyoning 170 dan ortiq mamlakati tan oldi, 125 dan ortiq mamlakatlar bilan rasmiy diplomatik munosabatlar oʻrnatdik.

Shu bilan birga, mustaqillik yillarida davlatimizning tashqi siyosiy va tashqi iqtisodiy aloqalarni rivojlantirishdagi huquqiy tamoyillari ishlab chiqildi.

Oʻttiz toʻrt yillik mehnatimiz, sa’y-harakatlarimiz, intilishlarimiz, maqsadlarimiz sari ishonchli odimlarimiz, eng asosiysi, huquqiy mukammal jamiyat barpo qilish maqsadida jadal olib borilayotgan islohotlar natijasida millatimiz, mamlakatimizning jahon obroʻ-e’tibori, shon-shavkatini koʻtaradigan avlod yetishdi, har jihatdan barkamol va fidoyi oʻgʻil-qizlar tarbiyalanmoqda, voyaga yetmoqda va oʻz baxtini oʻzi yaratmoqda.

Darhaqiqat, davrning, hayotning keskin talablaridan ortda qolmaslik uchun barchamiz har kuni oʻqib-oʻrganishimiz, oʻz ustimizda ishlashimiz, bilim va saviyamizni doimo oshirib borishimiz, oʻz huquqimizni bilib, boshqalarga uni hurmat qilishga oʻrgatib, ishontirib, inontirishimiz kerak.

Shu oʻrinda haqli savol tugʻiladi. Xoʻsh, bu muvaffaqiyatlarga nimalar evaziga erishildi?
Avvalo, oqilona olib borilgan siyosat tufayli Oʻzbekistonimiz sanoati tez sur’atlar bilan oʻsib, iqtisodiy qudrati va salohiyati yuksalib borayotgan davlatga aylandi.

Qisqa fursat mobaynida mamlakatimizda davlat va nodavlat tashkilotlari tomonidan xalq bilan ochiq va samarali muloqot olib borish tizimi yoʻlga qoʻyildi. Buning natijasida fuqarolarning koʻplab murojaat va muammolari qonuniy hal etila boshlandi.

Jamiyatda tadbirkorlik muhiti jonlantirib yuborildi. Ishbilarmonlarga davlat tomonidan qulay imkoniyatlar yaratilmoqda. Har bir oilada tadbirkorlikka, oʻzini oʻzi boqishga, real daromadga ega boʻlishga moyillik hissi shakllantirilmoqda, tashabbuslar ragʻbatlantirilmoqda. Bularning bari mamlakatda ishlab chiqarish va xizmatlarning misli koʻrilmagan turlari, koʻplab yangi ish oʻrinlari yuzaga kelishiga asos boʻlmoqda. Xalq ong-tafakkuri, dunyoqarashining oʻzgargani – mustaqillik yillarida erishgan eng katta boyligimiz.
Bashariyat tarixi shundan guvohlik beradiki, hech bir mamlakat oʻzi yolgʻiz holda taraqqiy etgan emas. Chunki murakkab dunyoning koʻpdan-koʻp muammolari aynan hamkorlikda, doʻstona tarzda hal etiladi. Shu jihatdan qaraganda, Oʻzbekistonimizda xavfsizlik, millatlararo totuvlik va diniy bagʻrikenglikni ta’minlash, chuqur oʻylangan, oʻzaro manfaatli va amaliy ruhdagi tashqi siyosat yuritish orqali davlatimiz mustaqilligi va suverenitetini mustahkamlash, qoʻshnilarimiz bilan raqobat qilish emas, balki hamkorlik qilish, mintaqamizdagi muammolarni birgalikda hal etish tamoyiliga qat’iy amal qilinadi.

Davlatning xalqga bunday qayishishi natijasida odamlarning ruhiyatida katta oʻzgarish yuz berdi. Fuqarolarning ijtimoiy faolligi ortdi, siyosiy xabardorlik darajasi koʻtarildi.

Shuni unutmasligimiz kerakki, bugun biz oʻta tahlikali va qaltis zamonda yashayapmiz. Yon-atrofimizda turli xavf-xatarlar kuchayib borayotgan bir sharoitda eng katta va bebaho boyligimiz boʻlgan tinchlik-osoyishtalikni koʻz qorachigʻidek saqlashimiz zarur. Millatlar va fuqarolar oʻrtasidagi doʻstlik va hamjihatlik, oʻzaro hurmat, mehr-oqibat muhitini yanada mustahkamlash, doimo hushyor va ogoh boʻlib, tinchlik uchun kurashib yashash bugun hal qiluvchi ahamiyatga ega. Buni har birimiz chuqur his etishimiz darkor. Shuni ham unutmasligimiz kerakki, bugungi tinchlik-osoyishtalik oʻz-oʻzicha ta’minlanayotgani yoʻq. Mustaqillikni mustahkamlash, uni himoya qilish hech qachon oʻz dolzarbligini yoʻqotmaydi.

Bir soʻz bilan aytganda, davlatimiz rahbarining “Oʻzbekiston Respublikasi davlat mustaqilligining oʻttiz toʻrt yillik bayramiga tayyorgarlik koʻrish va uni oʻtkazish toʻgʻrisida”gi qarorida alohida qayd etilganidek, “Hech shubhasiz, 1991 yil 31 avgustda mard va olijanob xalqimizning xohish-irodasi va azmu qarori bilan qoʻlga kiritilgan milliy istiqlolimiz Yangi Oʻzbekistonni barpo etish yoʻlidagi barcha islohotlarimiz hal qiluvchi bosqichga kirayotgan bugungi tarixiy sharoitda har qachongidan ham muhim ahamiyat kasb etmoqda”.