Mamlakatimizda o‘sib kelayotgan yosh avlod vakillariga har tomonlama e’tibor va g‘amxo‘rlik ko‘rsatish, ularning intilishlarini qo‘llab-quvvatlash va rag‘batlantirish, mustaqil fikrlaydigan, zukko va keng dunyoqarashga ega o‘g‘il-qizlarni tarbiyalash borasidagi ishlarga davlat siyosatining eng muhim va ustuvor yo‘nalishi sifatida alohida ahamiyat berilmoqda.

Keyingi yillarda barcha sohalarda bo‘lgani kabi yoshlarning ta’lim-tarbiyasiga oid ishlarda ham tub burilish yasaldi. Davlat rahbari kuni kecha mamlakatimizda keng miqyosida tashkil etilgan Yoshlar kuniga bag‘ishlangan bayram tadbirida ishtirok etib, Yangi O‘zbekistonning barcha yoshlarini bayram bilan muborakbod etdi.

“Birinchi va ikkinchi Renessansni buyuk alloma va mutafakkirlarimiz yaratgan bo‘lsa, bugun tarix navbatni sizlarga bermoqda. Ishonchim komil, sizlar barcha sohalarda mamlakatimiz bayrog‘ini baland ko‘tarishga qodirsiz. Sizlar – Yangi O‘zbekiston bunyodkorlari sifatida yangi tarix yaratadigan oltin avlodsiz”, dedi Shavkat Mirziyoyev jumladan o‘z nutqida.

Yoshlar kelajagini ta’minlashda bilim va kasb o‘rganishning o‘rni beqiyos. Davlatimiz rahbari aynan shu masalaga e’tibor qaratib, zamonaviy kasblar va xorijiy tillarni o‘qitishni kengaytirish zarurligini ta’kidladi. Bunday yondashuv yosh avlodni faqat mehnat bozori talablariga tayyorlash emas, balki ularning global miqyosda raqobatbardosh shaxs sifatida shakllanishiga xizmat qiladi.

Hozirda O‘zbekistonda 15 mingga yaqin o‘quv markazlari va 7,5 mingta kasbga o‘qitish markazlari faoliyat ko‘rsatmoqda. Bu raqamlar o‘ziga xos ilg‘or salohiyatni aks ettirsa-da, ularning sifati va faoliyat yo‘nalishlari ham ayni paytda qayta ko‘rib chiqilishi talab etiladi. Zero, faqat son jihatidan o‘sish emas, balki mazmun jihatidan ham islohotlarga ehtiyoj bor. Ushbu markazlar so‘nggi yillarda 100 dan ortiq imtiyozlar bilan davlat tomonidan qo‘llab-quvvatlangani, shubhasiz, ularning infratuzilmasini rivojlantirish, mutaxassislar jalb etish va ta’lim sifatiga ijobiy ta’sir ko‘rsatgan.

Biroq davlat rahbari ta’kidlaganidek, markazlar faqat mavjud ko‘rsatkichlar bilan cheklanib qolmasligi lozim. Ya’ni, ular nafaqat mutaxassislik o‘rgatuvchi muassasa, balki yoshlarni har tomonlama rivojlantiruvchi maskanga aylanishi shart. Bundan ko‘zlangan asosiy maqsad — yoshlarning ijtimoiy-ma’naviy kamolotini ta’minlash, ularda mustaqil fikrlash, tashabbuskorlik va innovatsion yondashuvni shakllantirishdir.

Zamonaviy kasblar – axborot texnologiyalari, robototexnika, kiberxavfsizlik, grafik dizayn, moliyaviy savodxonlik, ekologik mutaxassisliklar va shu kabi yo‘nalishlar hozirgi kun talabiga aylangan. Xorijiy tillarni bilish esa nafaqat ta’lim, balki ish bilan ta’minlashda ham hal qiluvchi omil hisoblanadi. Bu borada davlatning tashabbuslari ta’lim-ishlab chiqarish integratsiyasiga asoslanishi va xususiy sektor bilan hamkorlikda amalga oshirilishi muhim.

Xulosa qilib aytganda, yoshlarni kasb va til o‘rganishga keng jalb qilish bo‘yicha olib borilayotgan siyosat strategik ahamiyatga ega. Ushbu jarayonni tizimli ravishda davom ettirish, markazlarni yoshlar uchun muloqot, rivojlanish va tajriba maydoniga aylantirish kelajakni bilimli, malaka va madaniyatga ega avlod qo‘liga topshirishga zamin yaratadi.