Yaqin kunlarda mamlakatimiz o‘z mustaqilligining o‘ttiz to‘rt yillik bayramini nishonlaydi. Tarix uchun bu qisqa davr, lekin ana shu yillar davomida mamlakatimiz ijtimoiy-siyosiy hayotining barcha jabhalarida ijobiy ishlar amalga oshirildi. Yurtimiz iqtisodiyoti yuksaldi, ma’naviy, milliy, diniy qadriyatlarimiz tiklandi, nafaqat xalqimiz, balki shu yurtda yashayotgan barcha millat va elat vakillari emin-erkin yashash, mehnat qilish imkoniga ega bo‘ldi.

Mustaqillik bergan imkoniyatlar to‘g‘risida juda ko‘plab gapirishimiz mumkin. Lekin shu bilan birga, istiqlol yillarida bosib o‘tilgan mashaqqatli yo‘lga yana bir bor nazar tashlashimiz, amalga oshirilgan ishlar, erishilgan natijalarni xolisona baholashimiz va ularning mazmun-mohiyatini avvalo o‘zimiz anglashimiz, so‘ng keng jamoatchilikka, butun xalqimizga yetkazishimiz maqsadga muvofiqdir.

Mustaqillik taqdim etgan tengsiz imkoniyatlardan biri bu shubhasiz ko‘plab yosh iste’dodlar kashf etilgani, so‘nggi yillarda yoshlarga oid davlat siyosati doirasida amalga oshirilgan islohotlar samarasi o‘laroq, bugun Yangi O‘zbekiston yoshlari ilm-fan, ta’lim, madaniyat, san’at, sport sohasida xalqaro darajadagi katta yutuqlarga erishib, yurtimiz bayrog‘ini ko‘klarga ko‘taryotganidir.

Darhaqiqat, yosh avlodni har tomonlama sog‘lom va barkamol etib tarbiyalash – yangi rivojlanish bosqichida ustuvor vazifa hisoblanadi. Shu maqsadda O‘zbekistonda olib borilayotgan islohotlarning bir qismi yoshlarga qaratilgan. Davlatimiz tomonidan yoshlarni ijtimoiy qo‘llab-quvvatlash, yoshlarning shaxsiy, siyosiy, iqtisodiy hamda ijtimoiy huquqlari, erkinliklari va qonuniy manfaatlarini himoya qilish va ro‘yobga chiqarishni ta’minlaydigan zarur sharoitlarni yaratish, jamiyat hayotida ularning o‘rni va faolligini oshirish masalasiga alohida e’tibor qaratilmoqda.

O‘tgan qisqa davrda ushbu yo‘nalishda 100 dan ortiq qonun hujjatlari qabul qilindi. Ayniqsa, yangilangan Konstitutsiyada yosh avlodning huquq va manfaatlari aniq moddalar bilan muhrlab qo‘yilgani, bu boradagi huquqiy bazani yanada kengaytirish, amaliy ishlarimizni yangi bosqichga ko‘tarish imkonini bermoqda.

Prezidentimiz “O‘zbekiston Respublikasi davlat mustaqilligining o‘ttiz to‘rt yillik bayramiga tayyorgarlik ko‘rish va uni o‘tkazish to‘g‘risida”gi qarorida ham “Yoshlar – Yangi O‘zbekiston bunyodkorlari” degan shior ostida navqiron avlodimizning zamonaviy bilim va kasb-hunarlar, ona tili bilan birga xorijiy tillarni, IT texnologiyalarini egallashlari, tadbirkorlik bilan shug‘ullanishlari, iste’dod va qobiliyatini ro‘yobga chiqarishlari uchun har tomonlama qulay shart-sharoit yaratilayotganini, bunga javoban o‘g‘il-qizlarimiz turli sohalarda dastlabki quvonchli yutuqlarga erishayotganlarini tarannum etish ustuvor vazifa sifatida belgilandi. Aytish kerakki, bunday g‘oyatda ulug‘vor maqsad va vazifalar ushbu qutlug‘ sanani davlatimiz va jamiyatimizning bugungi taraqqiyot darajasi, xalqaro maydondagi obro‘-e’tiboriga munosib ravishda yuksak saviyada keng nishonlashga asos bo‘ladi.

Bir so‘z bilan aytganda, bugun O‘zbekiston o‘z taraqqiyotining yangi bosqichiga dadil qadam qo‘ymoqda. Mamlakatimizni modernizatsiya qilish, inson huquq va erkinliklarini, qonun ustuvorligini ta’minlash asosida O‘zbekistonning yangi qiyofasi yaratilmoqda. Yangi O‘zbekistonning dunyo mamlakatlari orasida o‘z so‘ziga ega bo‘lishi esa ko‘p jihatdan zamonaviy bilimlarni puxta egallagan, keng dunyoqarashga ega, ma’naviyatli yoshlarga bog‘liqdir.