Mustaqillik — shunday ulug‘ ne’matki, u milliy o‘zligimiz, milliy davlatchiligimiz, qadriyat va an’analarimiz, beqiyos tariximiz va ma’naviyatimiz, haq-huquq va qadr-qimmatimizni qaytarib berdi.

Istiqlol yillarida yurtimizda yangi davlat va jamiyat qurish yo‘lida tarixiy ishlar amalga oshirildi, mard va olijanob xalqimizning bukilmas irodasi va ulkan salohiyati bilan katta marralar zabt etildi.

O‘zbekiston xalqi mamlakatimizning jahon hamjamiyatida munosib o‘rin egallashiga asos bo‘luvchi ulkan yutuqlarni qo‘lga kiritdi. Mustaqillik xalqchil va demokratik tamoyillarga asoslangan davlat, inson qadri ustuvor bo‘lgan erkin fuqarolik jamiyatini barpo etish imkonini berdi.

O‘tgan o‘ttiz to‘rt yil ozod Vatanimiz uchun tom ma’nodagi uyg‘onish, tiklanish va yuksalish davri bo‘ldi. Iqtisodiyot, ilm-fan, madaniyat, ma’rifat, ma’naviyat, demokratik jamiyat qurilishi va boshqa sohalarda mislsiz yutuqlar qo‘lga kiritildi. Ayniqsa, oxirgi yillarda barcha sohada amalga oshirilayotgan o‘zgarishlar shiddatli tus oldi.

Mamlakatimiz taraqqiyotning yangi bosqichiga qadam qo‘yib, barcha soha va tarmoqlarda tub islohotlar amalga oshirilmoqda, demokratik yangilanish jarayonlari kechmoqda. O‘tgan davr erkin va farovon hayotni, buyuk kelajakni faqat va faqat mustaqillik asosidagina qurish mumkinligini ko‘rsatdi.

Yuqori siyosiy iroda tufayli O‘zbekiston dunyoga, dunyo O‘zbekistonga ochildi. Ayniqsa, mintaqa davlatlari bilan muzlatilgan munosabatlarga iliqlik kirdi. Yillar davomida yechimini kutayotgan muammolar hal etildi. Buning natijasida Markaziy Osiyo davlatlari bilan barcha sohalardagi aloqalarimiz yangi bosqichga chiqdi.
O‘zbekistonning dunyoga ochilishi va shaffof, pragmatik siyosat mintaqa tashqi siyosatidagi vektorlariga ham ijobiy ta’sir ko‘rsatdi. Hozirgi kunda qo‘shni mamlakatlar bilan aloqalarni mustahkamlash bo‘yicha amaldagi siyosatimizni jahon hamjamiyati e’tirof etmoqda.

O‘tgan tarixan qisqa davrda yurtimizning Markaziy Osiyo mintaqasi va jahon miqyosidagi siyosiy o‘rni va nufuzi keskin oshdi. Dunyo yangi O‘zbekistonga nisbatan ishonch ruhi va mamlakatimiz bilan hamkorlikka intilish tamoyillari kuchaydi. Keyingi yetti yil ichida mintaqaning yuragida joylashgan mamlakat – O‘zbekistonning o‘zgargani, qo‘shnilar, qolaversa, jahon hamjamiyati bilan ochiq siyosat yuritishga o‘tgani hisobiga yuz berayotganini barchasi ko‘rib, his qilib turibdi.

Prezidentimiz imzolagan “O‘zbekiston Respublikasi davlat mustaqilligining o‘ttiz to‘rt yillik bayramiga tayyorgarlik ko‘rish va uni yuqori saviyada o‘tkazish to‘g‘risida”gi qarorda ham joylarda qutlug‘ ayyomni yuqori saviyada nishonlash uchun tashkil etiladigan turli tadbirlarda ushbu masalalarga alohida e’tibor qaratish qayd etilganini ta’kidlash lozim.

Xususan, Yangi O‘zbekistonni barpo etish bo‘yicha sakkiz yil oldin boshlangan keng ko‘lamli islohotlarimiz tufayli jamiyatimizning ijtimoiy-siyosiy manzarasi butunlay o‘zgarib borayotgani, ko‘p millatli va ko‘p konfessiyali jamiyatimizdagi tinchlik, o‘zaro do‘stlik va hamjihatlik muhiti – bizning bebaho boyligimiz ekani, uni asrab-avaylash va mustahkamlash barchamizning muqaddas burchimiz bo‘lib qolishi zarurligi, O‘zbekistonning Markaziy Osiyo mintaqasida yaxshi qo‘shnichilik, hamkorlik va integratsiya jarayonlarini kuchaytirishdagi o‘rni va nufuzi ortib, yangi bosqichga ko‘tarilayotgani, Yangi O‘zbekistonning jahon hamjamiyatida ochiq, demokratik va dunyoviy davlat sifatidagi obro‘-e’tibori va nufuzi tobora yuksalib borayotgani shular jumlasidandir.

Haqiqatan ham bugun mamlakatimizda kechayotgan islohotlar natijasida, ayniqsa, davlatimiz rahbarining inson manfaatlarini ta’minlash yo‘lida olib borayotgan sa’y-harakatlari sababli “Yangi O‘zbekiston orzusi” real haqiqatga aylanmoqda. Buni xalqaro maydonda Vatanimizga nisbatan hurmat va e’tibor tobora ortib borayotgani yaqqol tasdiqlab turibdi.

O‘zingiz ayting, qachon bizda bunday keng qamrovli islohotlar amalga oshirilgan yoki shunga harakat qilingan? Keyingi sakkiz yil ichida birorta oy yoki hafta bormikin, unda xalq manfaati yo‘lida qonun, qaror yoki farmon chiqmagan bo‘lsa? O‘zbekiston yetakchisi bu demokratik o‘zgarishlarni kimlargadir yoqish, maqtanish, turli reytinglarga kirish uchun emas, aksincha, xalqimizning bugungi hayoti va ertangi istiqbolini o‘ylab, milliy manfaatlarimiz yo‘lida amalga oshirmoqda.

Yangi O‘zbekistonda izchillik bilan amalga oshirilayotgan shiddatli islohotlar natijasida “Inson qadri uchun” tamoyili jamiyatda o‘z ifodasini topib, yurtimizda istiqomat qilayotgan har bir fuqaroning hayotiy manfaatlari, orzu-umidlari ro‘yobga chiqib, chinakam yashash zavqini tuymoqda. Shuning uchun bugungi O‘zbekiston – kechagi O‘zbekiston emas, bugungi xalqimiz ham kechagi xalq emas, deb aytishga barcha asoslarimiz bor.

Inson qayerda dunyoga kelsa, ana shu yer uning uchun aziz Vatan hisoblanadi. Kindik qoni to‘kilgan joy inson uchun hech narsaga almashtirib bo‘lmaydigan, hamma narsadan ham qimmatli dargohdir! Mamlakatimizning davlat mustaqilligiga erishishi, huquqiy demokratik davlat qurilishi, yangi jamiyatga o‘tish davrida siyosiy-iqtisodiy islohotlarni chuqurlashtirishga doir tadbirlar, ijtimoiy-siyosiy barqarorlikni ta’minlash, ma’naviy-ruhiy poklanish hamda O‘zbekistonning jahon hamjamiyatidan munosib o‘rin olishi muhim tarixiy voqealardir.

Sir emas bu yilgi bayram tadbirlari “Vatan uchun, millat uchun, xalq uchun!” degan ezgu g‘oyani o‘zida mujassam etgan holda o‘tkaziladi. Ta’bir joiz bo‘lsa, vatan uchun yashash bu yurtimizning taraqqiyoti uchun intilish, uning sha’nini himoya qilish, uni dunyo tan oladigan zamonaviy, obod mamlakatga aylantirish demakdir. Millat uchun fido bo‘lish — o‘z tilimizni, madaniyatimizni, milliy qadriyatlarimizni hurmat qilish, uni yoshlar qalbiga singdirishdir. Xalq uchun yashash esa fidokorlik, samimiyat va halol mehnat orqali jamiyatga hissa qo‘shish demakdir.

Bir so‘z bilan aytganda, davlatimiz rahbari boshchiligida yurtimizda amalga oshirilayotgan islohotlarni amalga oshirishda fidokorona qatnashib, Mustaqillikning buyuk ne’matlariga shukrona qilib, qadriga yetib yashash hamda mustaqilligimizni yanada mustahkamlashga munosib hissa qo‘shish barchamiz uchun ham qarz, ham farz bo‘lishi kerak.