O‘tayotgan har bir kun bizni eng ulug‘, eng aziz bayram – mustaqilligimizning 34 yilligiga yaqinlashtirmoqda. Davlatimiz rahbarining qaroriga ko‘ra, bu yilgi shodiyonalar “Vatan uchun, millat uchun, xalq uchun!” shiori ostida o‘tkazilishi belgilandi.

Ta’kidlab o‘tish joizki, istiqlol el-yurtimiz uchun o‘z taqdirining haqiqiy egasi bo‘lishi, qadr-qimmatini anglashi, munosib hayot kechirishi, yurtimizda huquqiy demokratik davlat va fuqarolik jamiyatini barpo etishi kabi keng imkoniyatlarni yaratdi. Jumladan, mustaqillik sharofati tufayli yurtimizda inson qadrini yuksaltirish hamda aholining farovon turmush kechirishini ta’minlash davlatning eng ustuvor vazifasiga aylandi.

Bu borada, ayniqsa, so‘nggi yillarda qator tizimli strategik islohotlar amalga oshirilmoqda:

Birinchidan, yurtimizda amalga oshirilayotgan barcha ijobiy o‘zgarishlarning asosini “Inson qadri uchun” tamoyili tashkil qilmoqda. Jumladan, yangi tahrirdagi Konstitutsiyaning 1-moddasida ham “O‘zbekiston – ijtimoiy davlat” ekanligi huquqiy jihatdan mustahkamlab qo‘yildi. Zero, “inson qadri” tushunchasi “ijtimoiy davlat” tushunchasi bilan chambarchas bog‘liq bo‘lib, ushbu g‘oyaning tub negizida, avvalo, inson qadrini ulug‘lash, insonga xizmat qilishdek olijanob maqsad mujassamdir.

Ikkinchidan, insonning huquq va manfaatlarini ta’minlash, uning sha’ni va qadr-qimmatini himoya qilish, sud-huquq tizimini isloh qilish ichki siyosatning asosiy ustuvor yo‘nalishiga aylandi. Xususan, so‘nggi yillarda mamlakatimizda, avvalo, “Inson qadri uchun” degan ustuvor tamoyilni to‘la ro‘yobga chiqarish hamda inson, uning hayoti, erkinligi, sha’ni, qadr-qimmati, qonuniy ehtiyojlari va manfaatlarini himoya qilishni ta’minlash davlatning alohida diqqat markazida turganini ta’kidlash lozim.

Uchinchidan, yangilanayotgan va Uchinchi Renessansga qadam qo‘yayotgan Yangi O‘zbekistonsiz ta’lim-tarbiya, ilm-fansiz tasavvur qilib bo‘lmaydi. Davlatimiz rahbari 2020 yilda O‘zbekiston Respublikasi Oliy Majlisi va xalqimizga yo‘llagan Murojaatnomasida ta’lim-tarbiya tizimi haqida so‘z yuritib, “Yangi O‘zbekiston – maktab ostonasidan, ta’lim-tarbiya tizimidan boshlanadi” degan konseptual g‘oyani ilgari surgan edi.

Mazkur g‘oya asosida maktab ta’limini rivojlantirish umummilliy harakatga aylandi, ta’lim-tarbiya tizimini tubdan isloh qilishga juda katta e’tibor qaratib kelinmoqda.

To‘rtinchidan, ta’kidlash lozimki, mustaqillik tufayli mamlakatimiz xalqaro huquqning to‘laqonli subyektiga aylandi. Bugun O‘zbekiston jahon siyosiy maydonida o‘z o‘rni va ovoziga ega. O‘zbekiston xalqaro hamjamiyatning teng va to‘la huquqli a’zosi sifatida BMT, SHHT, MDH, EYXHT va IHT kabi nufuzli xalqaro tuzilmalar faoliyatida faol ishtirok etib kelmoqda. To‘la ishonch bilan aytish mumkinki, aynan mamlakatimiz rahbarining sa’y-harakatlari tufayli Markaziy Osiyo mintaqasi yaxlit organizm sifatida qayta kashf etildi va rivojlanmoqda. Mintaqa qiyofasi va imiji tubdan o‘zgarib, davlatlar o‘rtasida o‘zaro ishonch va hamkorlikka asoslangan mutlaqo yangi muhit shakllandi.

Muxtasar aytganda, mamlakatimizning mustaqilligi xalqimizning o‘z taqdirini o‘zi belgilashi, erkin tafakkur asosida yashash, milliy va umumbashariy qadriyatlarga tayanib ish ko‘rish kabi jihatlarga asoslanadi. Bu esa, o‘z navbatida, butun xalqimizni Yangi O‘zbekistonni barpo etishdek oliy maqsad yo‘lida birlashtirib, yangi yutuq va marralar sari yetaklashi shubhasiz.