Milliy Kontent

Turizm qo‘mitasi tomonidan Tashqi ishlar vazirligi bilan hamkorlikda joriy yilning 5–12-avgust kunlari Singapurning “Studio59 Concepts” media kompaniyasi ijodiy guruhining O‘zbekistonga tashrifi tashkil etildi.

Ijodiy guruh Singapurning “Suria TV channel” ommabop telekanalida efirga uzatiladigan “Food Travel” teledasturi uchun Xiva va Samarqand viloyatlarining madaniy merosi, turizm infratuzilmasi, gastroturizm salohiyatiga bag‘ishlangan 8 ta epizoddan iborat ko‘rsatuv uchun tasvirga olish ishlarini amalga oshirdilar.

Tashrif davomida ijodiy guruh qadimiy Xivaga, uning yuragi bo‘lgan “Ichan qal’a” tarixiy majmuasi va “Arda Xiva” zamonaviy sayyohlik markaziga tashrif buyurib, “Qovun sayli–2025” festivali mehmoni bo‘ldilar. Mehmonlar rang-barang qovun navlaridan tatib ko‘rib, milliy kuy-qo‘shiqlar va xalqimizning samimiy mehmondo‘stligidan zavq oldilar.

Samarqand viloyatida mehmonlar Registon maydoni, Shohi Zinda majmuasi, Go‘ri Amir maqbarasi kabi tarixiy obidalar hamda viloyatning zamonaviy turizm infratuzilmasi bilan tanishdilar.

Ijodiy guruh a’zolari Samarqandning boy madaniy merosi va betakror me’moriy go‘zalligi ularni chuqur ilhomlantirganini qayd etdi. Ular safar davomida olingan foto va videomateriallarni xalqaro maydonda namoyish etish orqali O‘zbekistonning turizm salohiyatini keng targ‘ib etish rejasini bildirdilar.

Ushbu media loyiha O‘zbekistonning turistik jozibadorligi va gastronomik salohiyatini Malayziya, Singapur, Indoneziya davlatlarida namoyish etish va Osiyo mintaqasi mamlakatlaridan Respublikamizga kelayotgan sayyohlar oqimini oshirishga xizmat qilishi kutilmoqda.

O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi

O‘zbekiston turizmi Singapur telekanalida namoyish etiladi

Mavzuga doir

Tezkor xabarlar